ರೇವಾ ಭಾರತದ ಮೊದಲ ಎಲೆಕ್ಟ್ರಿಕ್ ಕಾರು. ಇದು 2 ಡೋರಿನ ಸಣ್ಣ ಹ್ಯಾಚ್ ಬ್ಯಾಕ್ ಕಾರಾಗಿದ್ದು, ಕೇವಲ 2.6 ಮೀಟರ್ ಉದ್ದ, 1.3 ಮೀಟರ್ ಅಗಲ ಮತ್ತು 1.5 ಮೀಟರ್ ಎತ್ತರವಿದೆ. ಇದರ ತೂಕ 750 ಕೆ.ಜಿ ಇದೆ. ಇದರ ಮುಂಬಾಗದ ಸೀಟ್ ನಲ್ಲಿ ಇಬ್ಬರು ದೊಡ್ಡವರು ಮತ್ತು ಹಿಂಬಾಗದಲ್ಲಿ ಇಬ್ಬರು ಮಕ್ಕಳು ಕುಳಿತುಕೊಳ್ಳಲು ಸಾಧ್ಯವಿದೆ. ಹಿಂಬಾಗದ ಸೀಟನ್ನು ಮಡುಚಿದರೆ ಲಗೇಜ್ ಸ್ಥಳಾವಕಾಶ ಸಾಕಷ್ಟಾಗುತ್ತದೆ. ಪ್ರಯಾಣಿಕರು ಮತ್ತು ಲಗೇಜ್ ಸೇರಿ 227 ಕೆ.ಜಿ. ಭಾರ ಹೊರುವ ಸಾಮರ್ಥ್ಯ ಈ ಕಾರಿಗಿದೆ. 

ಆಲ್ಟೊ, ನ್ಯಾನೊ ಕಾರುಗಳಿಗೆ ಹೋಲಿಸಿದರೆ ಇದು ಕೊಂಚ ದುಬಾರಿ ಕಾರೆಂದು ಎನಿಸಬಹುದು. ಇದಕ್ಕೆ ಬೆಂಗಳೂರು ಎಕ್ಸ್ ಶೋರೂಂ ದರ ಸುಮಾರು 3 ಲಕ್ಷ ರೂ.ನಿಂದ 4.15 ಲಕ್ಷ ರೂ. ಸ್ವಲ್ಪ ದುಬಾರಿ ಎನಿಸಿದರೂ ಇದರ ಸವಾರಿ ವೆಚ್ಚ ಹೆಚ್ಚೆಂದರೆ ಪ್ರತಿ ಕಿಲೋಮೀಟರ್ ಗೆ 40 ಪೈಸೆ! ಪೆಟ್ರೊಲ್ ಡೀಸಲ್ ಹಂಗಿಲ್ಲದೇ ಕರೆಂಟ್ ಚಾರ್ಜ್ ಮಾಡುವ ಮೂಲಕ ಸಿಟಿಯಲ್ಲಿ ಆರಾಮವಾಗಿ ಇದರಲ್ಲಿ ಪ್ರಯಾಣಿಸಬಹುದು. 

ಗುಬ್ಬಚ್ಚಿ ಗೂಡಿನಂತಹ ಈ ಪುಟ್ಟ ಕಾರು 6 ವೋಲ್ಟೆಜ್ ನ 8 ಆಸೀಡ್ ಬ್ಯಾಟರಿ ಹೊಂದಿದ್ದು ಒಟ್ಟಾರೆ 48 ವೋಲ್ಟೆಜ್ ಪವರ್ ನೀಡುತ್ತದೆ. ಇದರಲ್ಲಿ ಆನ್ ಬೋರ್ಡ್ ಚಾರ್ಜರ್ ಇದ್ದು, ಸುಲಭವಾಗಿ ಪ್ಲಗ್ ಮೂಲಕ ಚಾರ್ಜ್ ಮಾಡಿಕೊಳ್ಳಬಹುದಾಗಿದೆ. ಎಂಟುಗಂಟೆ ಚಾರ್ಜ್ ಮಾಡಿದರೆ ಪೂರ್ತಿ ತುಂಬುತ್ತದೆ. ರಾತ್ರಿ ಚಾರ್ಜ್ ಇಟ್ಟು ಮಲಗಿದರೆ ಸಾಕು. 

ಪೆಟ್ರೊಲ್ ಡೀಸಲ್ ದರಗಳು ದುಬಾರಿಯಾಗುತ್ತಿರುವ ಪ್ರಸಕ್ತ ಸನ್ನಿವೇಶದಲ್ಲಿ ಇಂತಹ ಎಲೆಕ್ಟ್ರಿಕ್ ಕಾರುಗಳಿಗೆ ಬೇಡಿಕೆ ಹೆಚ್ಚಾಗುತ್ತಿದೆ. ಬೆಂಗಳೂರಿನ ರಸ್ತೆಗಳಲ್ಲೂ ದಿನೇ ದಿನೇ ರೇವಾ ಕಾರುಗಳ ಸಂಖ್ಯೆ ಏರಿಕೆ ಕಾಣುತ್ತಿದೆ. ರೇವಾಐ ಎಂಬುದು ಆಟೋಮೋಟಿವ್ ರಿಸರ್ಚ್ ಅಸೋಸಿಯೇಸನ್ ಮತ್ತು ಯುರೋಪ್ ಆರ್ಥಿಕ ಸಮುದಾಯದಿಂದ ಮಾನ್ಯತೆ ಪಡೆದ ಎಲೆಕ್ಟ್ರಿಕ್ ಕಾರಾಗಿದೆ. ಇಂಗ್ಲೆಂಡ್ ಮತ್ತು ಯುರೋಪ್ ಮಾರುಕಟ್ಟೆಗಳಲ್ಲೂ ರೇವಾ ಕಾರುಗಳಿಗೆ ಬೇಡಿಕೆ ಹೆಚ್ಚುತ್ತಿದೆ.

ರೇವಾ ಪ್ರೊಫೈಲ್

* ಗರಿಷ್ಠ ವೇಗ ಪ್ರತಿಗಂಟೆಗೆ 80 ಕಿ.ಮೀ.

* 8 ಗಂಟೆಯಲ್ಲಿ ಪೂರ್ತಿ ಬ್ಯಾಟರಿ ಚಾರ್ಜ್

* ಟ್ಯೂಬ್ ಲೆಸ್ ಟೈರ್

* ಚಾಲನೆಗೆ ಸುಲಭವಾಗುವಂತಹ ಆಟೋಮ್ಯಾಟಿಕ್ ಗೇರ್

* ನಿರ್ವಹಣೆ ವೆಚ್ಚ ಕಡಿಮೆ

* ಸುಲಭವಾಗಿ ಚಾರ್ಜ್ ಮಾಡಬಹುದು

* ಪರಿಸರ ಸ್ನೇಹಿ